Belinda Balluku u takua sot me ministrin e Çështjeve Detare, Transportit dhe Infrastrukturës së Kroacisë, Oleg Butković, ku bëri të ditur temat e diskutimit mes tyre, duke pasur në fokus rritjen e bashkëpunimit mes dy vendeve.
Ajo tha se me homologun kroat u diskutua lidhur me një sërë çështjesh, të cilat prekin të dy vendet.
“Gjatë këtij takimi ne kemi biseduar për të gjithë hapat, që do hedhim në të ardhmen, duke nisur nga projekti më i rëndësishëm që Shqipëria ka, ndërkohë që Kroacia ka prej vitesh e ka nisur atë projekt dhe është drejt përfundimit, Korridorin Blu, i cili përshkon të gjithë anën e Ballkanit Perëndimor, atë anë që laget nga deti Adriatik dhe Joni duke filluar nga Kroacia dhe duke përfunduar në Greqi. Shqipëria ka një pjesë të rëndësishme të këtij Korridori, ndaj ashtu siç të gjithë janë në dijeni ne kemi nisur punën gjatë vitit të shkuar.”
Nga ana e tij, Butković vlerësoi gatishmërinë e palës shqiptare për të bashkëpunuar.
“Kemi prekur disa tema të rëndësishme për bashkëpunim dhe për thellim të raporteve tona. Kroacia është e interesuar në të gjitha këto pikat, temat të cilat ne i diskutuam sot siç është Korridori Blu, i cili është shumë i rëndësishëm edhe për ne.”
