I njëjti skenar i 19 dhjetorit u ripërsërit edhe këtë të hënë në mbledhjen e dytë të Këshillit të Mandateve për çështjen e Belinda Ballukut.
Anëtarët e Këshillit e nisën mbledhjen me debate ku tema kryesore ishte se si do të zhvillohej ajo.
Opozita kërkoi që të zhvillohej me dyer të hapura, por nuk morën mbështetjen e mazhorancës.
“Në parim, mbledhjet e organeve të Kuvendit janë të hapura dhe nuk ka asnjë arsye qe kjo mbledhje të mbahet me dyer të mbyllura. Ju zoti Kryetar keni detyrimin që ta hidhni këtë në votim. Nuk mund t’i fshihni publikut vjedhjen nga Belinda Balluku të miliona eurove, apo bashkëfajësinë e Edi Ramës në këtë çështje”, mësohet të jetë shprehur Gazment Bardhi.
Megjithatë në të njëjtën linjë si socialistët ishin dhe prokurorët e SPAK të cilët u shprehën se mund të diskutohen sekrete hetimore të cilat nuk mund të pasqyrohen për publikun.
Vetë anëtarët e mazhorancës janë shprehur se mbledhja mund të zhvillohet e hapur në momentin që prokurorët japin dritën jeshile.
Kjo është mbledhja e dytë e Këshillit të Mandateve për kërkesën e SPAK për t’i hequr imunitetin Belinda Ballukut e cila akuzohet për shkelje të barazisë në tendera.
