Inteligjenca amerikane ka publikuar raportin vjetor të kërcënimeve mbarë botërore ndaj sigurisë së SHBA-ve.
Në raport paralajmërohet për rrezik të shtuar dhe përshkallëzim të mëtejshëm të dhunës në Ballkanin perëndimor përgjatë këtij viti.
“Ballkani Perëndimor ndoshta do të përballet me një rrezik në rritje të dhunës së lokalizuar ndëretnike gjatë vitit 2024. Udhëheqësit nacionalistë ka të ngjarë të përkeqësojnë tensionin për avantazhin e tyre politik dhe aktorët e jashtëm do të përforcojnë dhe shfrytëzojnë dallimet etnike për të rritur ose mbrojtur ndikimin e tyre rajonal ose për të penguar integrim e Ballkanit në BE ose në institucionet euroatlantike”, tha komuniteti i inteligjencës amerikane.
Në raport përmenden përplasjet në veri të Kosovës ndërsa thuhet gjithashtu se udhëheqësi serb i Bosnjës, Milorad Dodik synon shkëputjen de fakto të Republikës Sërpska.
“Përleshjet mes nacionalistëve serbë dhe autoriteteve kosovare kanë çuar në vdekje dhe plagosje, duke përfshirë lëndimet e paqeruajtësve të NATO-s, në vitin 2023. Udhëheqësi serb i Bosnjës, Milorad Dodik po ndërmerr hapa provokues për të neutralizuar mbikëqyrjen ndërkombëtare në Bosnje dhe sigurimin e shkëputjes de facto të Republikës Srbska.”
Ambasada Amerikane në Sarajevë ka paralajmëruar edhe më herët për rrezikun e politikës separatiste të Dodikut, duke deklaruar se ajo vë në rrezik perspektivën evropiane të Bosnjë e Hercegovinës, demokracinë dhe ekonominë e saj.
Për shkak të aktiviteteve të tij, Miklorad Dodik është i sanksionuar nga SHBA dhe Britania e Madhe./vizionplus.tv
