Ministri i Brendshëm, Taulant Balla deklaroi pas mbledhjes së qeverisë se punonjësit e Policisë së Shtetit dhe punonjësit e Gardës do të mbështeten nga disa nisma të ndërmarra nga kabineti qeveritar.
Punonjësit që do të jetojnë në një qytet tjetër, për t’i shërbyer uniformës, do të iu paguhet qiraja nga buxheti i shtetit. Gjithashtu, punonjësit e Policisë do të mund të marrin kredi me 0 përqind interes.
Plani i qeverisë përfshin 900 punonjës policie që kanë probleme me strehimin, por sipas Ballës fillimisht do të përfitojnë vetëm 100 të tillë.
‘Të gjithë punonjësit e Gardës së Republikës që detyrohen të jetojnë në një qytet tjetër është e domosdoshme të mbulojmë qiranë për të gjithë këta punonjës që e kryejnë zhvendosjen për shkak të detyrës. Trajtimin me kredi me interes 0 të punonjësve të policisë së shtetit. Pas pak ditësh nëse punonjësi i policisë që ka krijuar një familje të re dhe është nën 40 vjeç, do të jetë gati në shtator menjëherë të aplikojnë.
Janë rreth 900 punonjës të policisë që kanë problematika me strehimin. Të trajtojmë 100 familje të para të punonjësve të policisë me banesa. Shpresoj që gjatë 2025 të përmbyllet e gjithë kjo fazë prej 900 familjesh të punonjësve të policisë. Objektivi kryesor është trajtimi i duhur dhe dinjitoz e financiar i policisë së shtetit. Besoj se para festave të fund vitit do të kemi mundësi të vizitoj disa nga punonjësit e policisë së shtetit në banesa të reja.’- tha Balla.
Nga ana tjetër, Balla theksoi se policia po arrin në një tjetër standard duke iu nënshtruar fazës së vetëpastrimit.
