Sekretari i Përgjithshëm i PS, Taulant Balla, në këtë fundvit, bëri bilancin e punëve të kryera gjatë 2020. Sipas tij, ndonëse ishte një vit i vështirë, në Bashkinë e Elbasanit punët nuk u ndalën për asnjë moment.
“Ndonëse 2020 ishte nje vit i vështirë për të gjithë vendin, punët në Bashkinë e Elbasanit nuk janë ndalur në asnjë çast. Me fillimin e pandemisë përgjatë muajve mars-prill-maj organizuam operacionet humanitare në mbështetje të të gjitha familjeve në veshtirësi ekonomike, por në mënyrë të veçantë për t’ju gjendur pranë familjeve të pensionisteve me të gjithë asistencën e nevojshme. Edhe bizneset e vogla nuk mund të ishin jashtë vëmendjes tonë. Falë mbështetjes së qeverisë, të shumtë ishin punonjësit dhe bizneset e vogla që u trajtuan me pagat e luftës. Pavaresisht se 2020 ishte një vit i vështirë, investimet në infrastrukturën rrugore, arsimore dhe shëndetësore nuk janë ndalur në asnjë çast. Gjatë katër viteve të qeverisjes tonë, investimet totale në Bashkinë Elbasan arrijnë në vlerën më të lartë historike, shifër kjo e pa krahasueshme me asnjë moment tjetër të këtyre 30 viteve.”
Teksa premtoi punë dhe investime të tjera në vijim, Balla uroi shqiptarët që viti 2021 të jetë i begatë.
