Debati mbi krizën e brendshme të opozitës dhe sfidat e skenës politike shqiptare u rikthye në qendër të vëmendjes mbrëmjen e sotme në emisionin “Quo Vadis” në Vizion Plus, nën moderimin e Pranvera Borakajt. Ish-kandidati për deputet i PD-së, Aulon Kalaja, dhe ish-zëvendëskryeministri Gazmend Oketa (PD) analizuan zhvillimet e fundit në Partinë Demokratike dhe klimën politike në vend, duke ngritur shqetësime mbi mungesën e parimeve demokratike në funksionimin e partive kryesore dhe nevojën urgjente për diskutim të hapur mbi reformimin e Kodit Zgjedhor.
Kalaja: Është e rëndësishme të kthejmë gishtin nga vetja jonë, të kuptojmë se ku jemi. Në rast se duam të ecim përpara duhet të jemi të pamëshirshëm në analizën e zgjedhjeve. Është domosdoshmëri që ne të diskutojmë. PD po kërkon të bëjë një kod të ri zgjedhor, por pse nuk pyeten qytetarët? Pse nuk pyetet baza? Ka ardhur momenti që t’i diskutojmë, të mblidhemi dhe t’i diskutojmë në forumet tona.
Oketa: Kalaja është njohës më i mirë i situatës së brendshme. Unë i shoh me shumë shqetësim zhvillimet e përgjithshme politike. Sot nuk kemi asnjë subjekt politk që të funksionojë mbi parime demokratike. Këtë e them qoftë për PS qoftë për PD. Shqetësimi im shkon më tepër se sa thjesht situata në PD. Nuk mendoj se është më e mirë situata në PS. Është një kazermë ushtarake. Kanë pushtet absolut. Prej 12 vitesh drejtojnë vendin. Kodi Zgjedhor nuk bëhet me deklarata mediatike. Pas cdo palë zgjedhjesh diskutohet nevoja për korigjim të kodit zgjedhor, kemi 20 vite që shikojmë të njëjtët aktorë politikë.
