Atentati ndaj Zamir Kalemit në Tiranë, policia jep 15 mijë euro për këdo që ka informacion për autorët

Policia ofron 15 mijë euro shpërblim për këdo që ka informacion për atentatin ndaj Zamit Kalemit mbrëmjen e djeshme në Tiranë.

Nga verifikimet paraprake, targat e automjetit AA 968 JD, të përdorura nga autorët, janë kallëzuar të vjedhura në Tiranë, në vitin 2018, dhe po ashtu edhe mjeti tip “Nissan”, ngjyrë gri me targë MHY6650, i cili rezulton i vjedhur në Greqi më datë 13.02.2023.

Lexo edhe :

Atentat 40-vjeçarit në Tiranë, qëllohet me breshëri në Unazën e Madhe, plagoset Zamir Kalemi

Detaje nga atentati ndaj Kalemit, kamerat e sigurisë fiksuan personin që kishte rolin e vëzhguesit

Dy zbrazën kallashnikovin ndaj Kalemit, i treti i priste në Bërzhitë, cili ishte plani i autorëve të atentatit në Tiranë

Vijon saga e hakmarrjes Papa-Sadikaj, shënjestra e atentatit në Selitë është vëllai i biznesmenit të njohur, i cili u plagos dy herë në Greqi

Ndërkohë, nga hetimet rezulton se kjo ngjarje ka lidhje me disa ngjarje të rënda kriminale të ndodhura gjatë vitit 2022 dhe 2023 në Shqipëri dhe Greqi, konkretisht vrasja e Aleksandër Sadikajt në Tiranë dhe atentatet ndaj Andrea Kalemit në Greqi, i cili është vëllai i Zamir Kalemit.

Njoftimi i policisë:

Më datë 12.01.2024, rreth orës 22:55, në vendin e quajtur “Nënkalimi i Selitës”, është tentuar të vritet me armë zjarri shtetasi Zamir Kalemi, i vitlindjes 1983, si pasojë ky shtetas ka marrë disa plagë me arrmë zjarri, dhe aktualisht ndodhet në spital nën kujdesin e mjekëve.

Drejtoria Vendore e Policisë Tiranë, ka ngritur menjëherë një grup të posaçëm hetimor, i cili në drejtimin e Prokurorisë të Rrethit Gjyqësor të Juridiksionit të Përgjithshëm Tiranë, ka kryer veprimet e nevojshme procedurale, ka këqyrur vendin e ngjarjes, ka këqyrur vendin e djegies së automjetit të përdorur nga autorët, ka sekuestruar provat materiale, ka pyetur në cilësinë e personit që ka dijeni për rrethanat e hetimit disa shtetas, ka sekuestruar dhe po vazhdon këqyerjen e pamjeve filmike në afërsi të vendit të ngjarjes.

Aktualisht grupi hetimor vazhdon punën për gjetjen dhe sekuestrimin e provave të tjera të rëndësishme për hetimin.

Nga analiza e rethanave të ngjarjes ka informacione se kjo ngjarje ka lidhje me disa ngjarje të rënda kriminale të ndodhura gjatë vitit 2022 dhe 2023 në Shqipëri dhe Greqi.

Drejtoria Vendore e Policisë Tiranë kërkon ndihmën e publikut për identifikimin dhe kapjen e autorëve të kësaj ngjarje dhe për çdo informacion të vlefshëm vendos në dispozicion shumën prej 15 000 euro, dhe informacioni mund të jepet në numrin +355694111546, duke garantuar anonimatin e çdo telefonuesi.

Informacione më të detajuara do të japim për mediat dhe për publikun, në vazhdim të hetimeve. /vizionplus.tv