Arsenali shkatërroi Manchester Cityn 5 me 1 në duelin më të rëndësishëm të javës së 23 të kampionatit anglez, dhe po provon të mbajë ritmin e jashtëzakonshëm të Liverpoolit kryesues.
Topçinjtë përfituan nga problemet e mëdha në prapavijë të skuadrës së Guardiolës, duke i dhënë një tjetër shuplakë të fortë kampionëve në fuqi të Anglisë. E të mendosh që pjesa e parë u luajt mes një intensiteti të lartë dhe në ekuilibër loje, me raste në të dyja portat, ndonëse londinezët ishin ata që fituan këtë 45-minutësh pasi mundën të shënonin që në fillim, me anë të Ødegaard.
Miqtë, përpos rasteve dhe një shtylle, nuk ia dolën të barazonin. Të paktën deri në minutën e 55, kur braziliani Savinjo shërbeu për Haaland dhe norvegjezi nuk gaboi duke ekuilibruar shifrat në Emirates.
Mirëpo, përgjigja e vendasve ishte ekstremisht e shpejtë pasi një minutë më vonë, Arsenali riktheu avantazhin përmes një goli të bukur nga distanca të Thomas Partey. 6 minuta më vonë ishte radha e të riut Luis Skelly për t’i çuar shifrat në 3 me 1. Dinamizmi i vendasve dhe gabimet në prapavijë me bollëk të Manchester Cityt, ndryshuan edhe dy herë të tjera rezultatin në favor të topçinjve në minutat 76 dhe 93, kur realizuan edhe Havertz dhe Nwaneri.
50 pikë për Arsenalin, 6 më pak sesa Liverpooli i vendit të parë, ndonëse të kuqtë kanë edhe një ndeshje të prapambetur. Ndërsa City i Pep Guardiolës mbetet në vendin e katërt me 41 pikë, aq sa ka edhe Newcastle i vendit të pestë.
