Këtë të premte në KAPITAL është diskutuar në lidhje me refuzimin e marrë nga BE për hapjen e negociatave për Shqipërinë dhe për Maqedoninë e Veriut.
Në një panel të ftuarish nën moderimin e Aleksandër Furxhiut, ajo që është vënë në dukje është se vendi tonë do ti mjaftonte një “PO” me kushte siç ishte ajo që morëm nga Bundestagu gjerman.
Arion Sulaj kryeredaktori i gazetës Liberale në fjalën e tij ka theksuar se Shqipëria nuk është gati për hapjen e negociatave dhe nuk mund të themi se na e ka fajin BE.
“Ne nuk jemi gati dhe kjo dihet nuk mund të themi se na e ka fajin BE kjo është e tepruar. Ne duhet të kishim marrë “Po” me kushte pa datë të caktuar. Duhet të ndërmerrnim hapa dhe të hetonim zgjedhjet në mënyrë që të na hapej një kapitull, të bënim një reformë tjetër dhe do të kishim mundësi të hapej një kapitull tjetër. Si do të futemi në Evropë pa sigurinë e pronës,ne nuk kemi vetëm 9 sëmundje por 90. Reforma në Drejtësi po pengohet.”
Zëvendës ministri për Punët e Jashtme, Etjen Xhafaj ka theksuar se gjate procesit e të negociatave do të ishte e rëndësishme të kishim një pakt kombëtar.
“Duhet të kishim një pakt kombëtar. Ajo që diskutohet sot nuk janë vendimet, por i gjithë procesi. Kushtet shtohen para se të hapet dera, nuk ka fitore për luftimin e krimit, do të punojmë për ngritjen e institucioneve që do na ndihmojnë në këtë betejë.”
Në KAPITAL, ndër të tjera ish ministri i ekonomisë Arben Malaj, ka theksuar se Gjermania me vendosjen e kushteve na ka nxjerrë në pah “sëmundjet”, që vuajmë dhe hapat që duhet të ndjekim për shërimin.
“Gjermanët na ndihmuan kur na vendosen kushtet, na nxorën në pak se ju jeni të “sëmurë” dhe këto janë gjërat që duhet të shëroni. Sot e morëm vesh ne se jo vetëm Franca por edhe Malta të ishte kundër ne serish do të kishim përgjigje negative. Hapja e negociatave, duhet të jenë prioritet në tavolinën e qeverisë dhe të opozitës. Në Shqipëri ekziston mosndëshkueshmëria e personave të përfshirë në krim, nuk kemi një funksionim të gjyqësorit.”
Ndërkohë Elsa Ballauri, përfaqësuese e shoqërisë civile nga Vizion Plus është shprehur se ka ardhur koha që qeveria dhe të gjithë përgjegjësit kryesorë pas kësaj përgjigje nga BE-ja tashmë ka ardhur momenti që ta pranojnë se ne jemi të “sëmurë”.
