Kryeministri Edi Rama iu drejtua sot opozitës me tone të ashpra gjatë seancës plenare, duke reaguar ndaj akuzave për pagimin e 1 miliard dollarëve për pjesëmarrjen e Shqipërisë në Bordin e Paqes dhe duke komentuar statusin “non grata” të ish-kryeministrit Sali Berisha.
Rama tha se Amerika nuk blihet me milionat që ata pretendojnë se do t’i përdornin për të influencuar vendimet ndërkombëtare.
Ai gjithashtu iu përgjigj edhe akuzave të PD-së se do të ketë të njëjtin fund si Presidenti i Venezuelës, Maduro, i cili u arrestua gjatë një aksioni të ushtrisë amerikane.
Rama: Tani që ushtria amerikane e anuloi hyrjen me helikopter në kryeminsitri, SPAK është stacioni i fundit i rrugës së shpresës suaj për pushtet. Ju kujtuat…
Bardhi: Je nervoz…
Rama: Unë nervoz? Unë kam pasionin e atij që sheh se si të gjitha kurthet në pyll janë plot…për ato kurthe duhet durim. Sa më shumë më thoni Ramaduro aq më shumë e dëgjoj “Rama duro”. Hiqeni Ramaduron më shumë më shtoni durimin. Ju kujtoni se Amerika blihet siç doni ta blini ju me milionat tuaja që ja u japin patriotet. Janë ca patriotë që shesin hamburger dhe ja u japin juve që të shpëlani atë që nuk shpëlahet dot. Ore Latif magjistarin ku e keni? Tani ka dhe një gjë tjetër. Mos e lini pas dore atë punën e “non gratës”. Siç ju kanë dalë të gjitha fjalët, do t’i dalë dhe fjala për “non gratën”. Ai që e ka marrë “non gratën” e ka merituar. Juve do t’i dalë fjala që “non grata” do hiqet në mars 2025. Pavarësisht se është 2026 ju vazhdoni thoni se në mars 2025 do ta hiqni. Ai (Berish) është i paarritshëm në poshtërsitë, ligësitë, pabesitë që i ka bërë popullit shqiptar dhe thikave pas shpinave që u ka nguluar të gjitha aleancave strategjike të Shqipërisë. Zor shumë se lëviz ajo kuotë (non grata).
