Pas bojkotimit të dy seancave të fundit parlamentare, grupi parlamentar i Partisë Demokratike është rikthyer në Kuvend, duke kërkuar që mazhoranca të shqyrtojë amendamentet e propozuara nga opozita.
Sipas deputetëve demokratë, prej një muaji shumica parlamentare nuk ka marrë në shqyrtim amendamentet e tyre, të cilat, sipas tyre, lidhen me kërkesat e ngritura nga protestuesit.
Gjatë seancës plenare, debati u shoqërua me përplasje mes deputetit të PD-së, Saimir Korreshi, dhe kryetarit të Kuvendit, Niko Peleshi.
Korreshi kërkoi vëmendjen e Peleshit për një çështje procedure, duke iu drejtuar disa herë nga foltorja e Kuvendit.
“Shoku kryetar, e mira është të mbash pak vesh nga salla, se për ty po flasim, nuk po flasim për muret. O shoku kryetar. Alo…alo…shoku kryetar”, tha Korreshi.
Nga ana tjetër, Peleshi i kërkoi deputetit demokrat të respektonte rregullat e komunikimit në sallën e Kuvendit.
“Shokun kryetar shko takoje aty ku ke shokët. Aty bërtit. Këtu nuk është festivali folklorik. Është seanca plenare e Kuvendit të Shqipërisë”, iu përgjigj Peleshi.
Korreshi akuzoi mazhorancën se nuk po merr parasysh kërkesat e opozitës dhe amendamentet e depozituara prej saj.
“Po ju drejtohem për këtë rregullore. Nëse e keni bërë për letër higjienike ta bënit më të hollë se na gërric. Ne nuk jemi punonjësit tuaj. Kemi ardhur me votat e qytetarëe. Përrallat me mamadhi që na vijnë nga Evropa herë pas here nuk shkojnë me ne. Meqë e doni kaq shumë opozitën ju, nuk mund të mos i kalonit ato 35 amendamente të opozitës. Ato ligjet që kemi ne, rrëzojini, por duhet të jenë këtu në Parlament”, tha Korreshi.
