Veç mbështetjes për bujqësinë ku pati replika mes Braces dhe Ministres Krifca, sqarime në seancën plenare u kërkuan edhe për Rrugën e Arbrit. Deputeti i PD, Xhelal Mziu, duke e konsideruar këtë si një projekt të demokratëve, tha se pas kaq vitesh, ai ende nuk ka përfunduar.
XHELAL MZIU
DEPUTET I PD
“Kjo rrugë sot e kësaj dite mbetet ëndërr për dibranët, bulqizakët se as gjysma e asaj rruge s’ka mbaruar dhe s’po flasim për efektin financiar që është i jashtëzakonshëm krahasuar me atë që do merret nëse ajo rrugë do mbarojë ndonjëherë. Kjo rrugë jo vetëm që ka mbaruar por as gjysma e asaj rruge nuk ka mbaruar. Ajo rrugë nuk plotëson kriteret e lidhjes me një qytet e jo më të jetë ndërkombëtare.”
Por ministrja Belinda Balluku iu përgjigj opozitës duke deklaruar se mazhoranca socialiste po përfundon punët e lëna përgjysmë nga Partia Demokratike.
BELINDA BALLUKU
MINISTRE E INFRASTRUKTURES DHE ENERGJISE
“Të vish në foltore dhe të thuash se rrugët kanë mbetur rrugëve nga ata që i lanë rrugëve, ky është një abuzim shumë i madh. Tani zotëria e di që kur vinte në fushatë, vinte dhe kthehej brenda ditës. Sot bujqësia në atë zonë ka lulëzuar edhe për shkak të infrastrukturës, flet për ëndrra dhe thotë Rruga e Arbrit mbeti ëndërr. Jo asgjë nuk mbeti ëndërr në qeverinë Rama. Ëndrrat i keni ju ne kemi detyrë t’jua bëjmë ëndrrat realitet sepse ju konsiderojmë si qytetarë të republikës së Shqipërisë.”
Por Xhelal Mziu i vijoi akuzat ndaj qeverisë, duke shtuar se punimet në Rrugën e Arbrit nuk janë cilësore dhe se në çdo segment të saj duhet të ecësh me shpejtësi minimale ose mund të përfunosh në humnerë.
