Presidenti i Kosovës, Hashim Thaçi ka ndarë me publikun lajmin se të hënën do të udhëtojë në Hagë, si i ftuar nga Prokuroria Speciale për t’u intervistuar.
Në një postim në “Facebook”, Thaçi shkruan se ai dhe bashkëluftëtarët do të përballen me dinjitet me drejtësinë ndërkombëtare, ndërkohë fton qytetarët të jenë të bashkuar për të përballuar sfidat e Kosovës.
“Në këto dy dekadat e fundit shumë pjesëtarë të UÇK-së u ballafaquan me drejtësinë ndërkombëtare të UNMIK-ut, Tribunalit të Hagës për Ish-Jugosllavi, EULEX-it dhe me drejtësinë vendore. Kosova, edhe pse viktimë, bashkëpunoi me organet e drejtësisë për trajtimin e pretendimeve për krime lufte. Në këto dy vitet e fundit shumë ish-bashkëluftëtarë janë intervistuar nga Dhomat e Specializuara, brenda dhe jashtë vendit. Të nderuar qytetarë të Republikës së Kosovës, Më lejoni të ndaj me ju se të hënën do të udhëtoj për në Hagë si i ftuar nga Prokuroria Speciale për t’u intervistuar. Deri sa bashkëluftëtarët e mi dhe unë do të përballemi me dinjitet dhe integritet me drejtësinë ndërkombëtare, ju ftoj që të bashkuar t’i përballojmë sfidat me të cilat po përballet vendi. Uniteti qytetar, bashkëjetesa ndëretnike, stabiliteti institucional dhe besimi në institucione janë të domosdoshme që Kosova ta jetësojë vizionin që të jetë pjesë e NATO-s, Bashkimit Evropian dhe të ruajë miqësinë e përjetshme me Shtetet e Bashkuara të Amerikës.”
Thaçi së bashku me kreun e PDK-së, Kadri Veseli u akuzuan nga Specialja për krime lufte. Pas publikimit të kësaj aktakuze, kreu i shtetit të Kosovës vendosi që të anulonte vizitën e tij në Shtëpinë e Bardhë në Washington për rifllimin e dialogut Kosovë-Serbi me ndërmjetësimin e Grenell.
