Kanë mbërritur në Gjykatën e Shkallës së Parë të Rrethit Gjyqësor Fier, të arrestuarit në kuadër të operacionit të zhvilluar në zyrat qëndrore të kompanisë “Bankers Petroleum” në Fier.
Drejtori i përgjithshëm aktual i kompanisë me shtetësi kineze, Hong Ping Xiao dhe ish-administratori Leonidha Çobo do të njihen me masën e sigurisë.
“Bankers Petroleum”, është vënë në qendër të një hetimi për evazion të përmasave të mëdha. Autoritetet bëjnë me dije se gjatë periudhës nga viti 2004 deri në vitin 2024 kompania ka raportuar humbje të vazhdueshme, pavarësisht të ardhurave të mëdha nga shitjet dhe eksportet e naftës bruto.
Sipas Prokurorisë së Fierit, Bankers ka realizuar shitje me vlerë rreth 532 miliardë lekë, por ka deklaruar shpenzime të fryra, duke raportuar humbje prej mbi 11.7 miliardë lekësh në total.
Deri tani janë lëshuar 14 masa sigurie, nga të cilat 9 janë ekzekutuar, ndërsa 5 shtetas, kryesisht të huaj, janë shpallur në kërkim ndërkombëtar.
