Kryetari i Federatës Pan-Shqiptare VATRA, Ahmet Xhafo dha një përgjigje për zërat se VATRA është kthyer në një organizatë militante. Duke evidentuar se sot janë krijuar dy VATRA, ai akuzoi Dritan Mishton për këtë gjë. Xhafo deklaroi se në janar të 2020, ai zhvilloi një Kuvend ku mbështetësit e tij, e kaluan stafetën tek Elmi Berisha.
“Ai mori drejtim në VATËR pa konkurrent sipas udhëzimeve të Mishtos dhe nuk e pati problem ta çonte VATRËN përpara gjykatës Federale duke e çuar kështu këtë insitucion 109-vjecar drejt një shkatërrimi financiar të paparë në historinë e saj”, tha Ahmet Xhafo në reagimin e tij.
Ai siguroi vatranët se do të luftojë që VATRA të shpëtohet nga militantët, sipas tij.
“Është një grup me në krye Z.Ahmet Xhafo që konsiderohet “franksionistë” nga ata që janë pjellë e grupeve politike dhe që e shikojnë lirinë e mendimit si franksion politik. Ky grup VATRANËSH po lufton pa pushim; jo pak, por prej 4 vitesh për VATRËN me shpenzimet e tyre për të mbrojtur këtë institucion kombëtar nga ata që po e drejtojnë drejt militantizmit dhe në konflikt me SHBA. Është hera e parë që vijat brenda insitucionit të VATRËS janë të qarta. Janë VATRANËT nën drejtimin e Ahmet Xhafos që mbrojnë institucionin ë VATRËS dhe duan ta çojne atë drejt një organizate të fortë institucionale, jo-politike, mbipartiake, dhe vetëm në shërbim të kombit dhe lidhjeve të forta me SHBA ashtu siç e kërkon kanunorja dhe që i përmbush qëllimet për të cilat kjo organizatë u krijua më 1912. Në krahun tjetër janë Elmi Berisha, Dritan Mishto dhe grupi i tyre që e duan VATRËN nën tutelen e dëshirave të militatizmit të tyre politik, shkatërrimin insitucional të saj, zhdukjen e mendimit të lirë dhe largimin nga VATRA të cdo individi që kundërshton dëshirat e tyre politike dhe interesat e tyre personale. Zgjedhja është e qartë -jo vetëm për vatranët por- edhe për ata që duan të ndihmojnë VATRËN dhe të bëhen pjesë e saj.”
Ahmet Xhafo theksoi se VATRA nuk u përket vetëm anëtarëve, por gjithë kombit dhe diasporës shqiptare në Amerikë. Për këdo që kritikon për gjendjen e VATRËS sot, ai bëri ftesë të ndihmojë në shpëtimin e saj.
