Ish-kreut të ARRSH-së, Dashamir Xhikës i është pushuar akuza e korrupsionit në lidhje me dosjen e autostradës Tiranë-Elbasan.
Gjykata për Krime të Rënda ka shpallur moskompetencë për dosjen e ish-kreut të ARRSH, Dashamir Xhika, duke ia kaluar Gjykatës së Tiranës.
Ish-kreu i Autoritetit Shqiptar të Rrugëve u prangos mbrëmjen e 2 shkurtit 2018 me akuzën e korrupsionit dhe shpërdorimit të detyrës.
Por pas shpalljes së moskompetencës nga ana e Gjykatës së Krimeve të Rënda ndaj tij tashmë rëndon vetëm akuza e shpërdorimit të detyrës.
Xhika dhe 2 ish-vartësit e tij Albens Alite dhe Aksel Qorduku akuzohen per abuzime ne ndërtimin e rrugës Tiranë-Elbasan.
Prokuroria i akuzon se i kanë shkaktuar shtetit një dëm prej 54 mln dollarë, ndërsa kjo rrugë do të kushtonte 407 milionë dollarë, deri në përfundimin e saj.
Gjykata e Shkallës së Parë për Krimet e Rënda e liroi Xhikën më 23 korrik me një vendim që u mor në fshehtësi, por pas apelimit nga prokuroria, gjykata e riktheu në burg në 1 shtator. Megjithatë, Xhika vijon betejën me drejtësinë për liri.
