A rrezikohet qeveria socialiste nga deklaratat e kryeministrit Edi Rama një ditë më parë përballë përfaqësuesve amerikanë? Kjo ishte një tjetër pyetje e drejtuar nga moderatorja e “Quo Vadis”, Pranvera Borakaj, për analistët dhe ekspertët e ftuar në studio.
Për analistin Indrit Vokshi, Rama ka sot luksin të luajë si të dojë me ndërkombëtarët, pa iu rrezikuar aspak pushteti, pasi sipas tij ai ia ka “shkulur puplat” opozitës.
Sipas tij, opozita nuk i imponon dot qeveri teknike Ramës, pasi nuk i ka numrat në Kuvend që mund të sillnin bllokim ligjesh.
Pjesë nga biseda:
Vokshi: Ka qenë një epokë kur Rama doli dhe foli kundër Trump. U çua gjysma e Shqipërisë dhe thanë që do vijë Trump, do e rrahë Ramën, por kjo nuk ndodhi. Në planin realist, Rama mbijeton sepse ka një shtet të fortë dhe rivalë të dobët, pavarësisht se sa i tensionon marrëdhëniet me ndërkombëtarët.
Borakaj: E ka luksin.
Vokshi: Po, e ka luksin, sepse ka 83 mandate. Qeveritë kanë një problem: duan një rival të fortë për t’i rrëzuar. Kush na e jep formulën që ikën Rama?
Borakaj: Ajo që artikulohet është një qeveri teknike.
Vokshi: Si provohet? Kur ka krizë. Pra, kur opozita ka 64–65 mandate dhe nuk kalon asnjë ligj për kapitujt e integrimit. Në këto kushte, kur ky ia ka shkulur puplat opozitës, bën si do. Rama po u jep biznes amerikanëve dhe po u thotë që unë jam këtu për ju. Po i thotë amerikanit që ti nuk pe kundër korrupsionit sepse nuk pagove lek. Pra, duhet shtruar pyetja se si do të bëhet qeveria teknike, pasi duhet kontributi i PS-së. Cili është mekanizmi që e detyron Ramën ta çojë vendin në qeveri teknike? Në 2017-ën, ndërkombëtarët e detyruan opozitën të futej në qeveri teknike.
