Teksa normaliteti ekonomik ende nuk është rikthyer, afati për të pezulluar deri në muajin maj pagesën e kësteve të kredive nuk duket të jetë i dobishëm për kredimarrësit që janë prekur financiarisht nga kjo situatë.
Banka e Shqipërisë thotë se është në fazë diskutimi me sistemin bankar për të parë mundësinë e shtyrjes edhe me tre muaj të tjetër këtë afat. Kjo do të thotë se nëse do të ketë një vendimmarrje, këstet e kredive do të pezullohen deri në muajin gusht, pa patur penalitet për huamarrësit, si individë edhe biznese.
Aktualisht ka banka të nivelit të dytë në mënyrë individuale e kanë marrë një nismë të tillë për klientët e tyre, por kjo praktikë nuk është e unifikuar. Burime nga shoqata e bankave thonë se edhe nisma për të shtyrë këstet me tre muaj nuk ka njohur zbatim të gjerë në sistem. Kjo pasi, klientët kryesisht individët kanë vijuar me pagesat, pasi kanë preferuar të shmangin pagesat e grumbulluara në kohë.
Paralelisht edhe bankat janë treguar të gatshme për të ristrukturuar kreditë deri në një rikthim të normalitetit ekonomik, kohë kur punonjësit dhe sektorë të bllokuar të ekonomisë të jenë në kapacitet të plotë. Bankat thonë se një pezullim 6 mujorë i pagesë së kredive nuk do të sillte ngërç në funksionimin e tyre, pasi sistemi është likuid.
