Ish-deputeti demokrat, Ervin Salianji ka reaguar pas ekzekutimeve në Lezhë dhe Durrës, ku katër persona humbën jetën brenda pak orësh këtë të hënë.
Në një postim në “Facebook”, demokrati shkruan se siguria publike ka degraduar dhe se keqqeverisja po merr jetë njerëzish.
“Katër të vrarë, dy në Lezhë, dy në Durrës në mes të rrugës tregojnë qartë degradimin e rendit dhe sigurisë publike, qesharakëzimin e postblloqeve me polici dhe me ushtri me mitraloza apo policë me syze dhe policë me armë nëpër godina bosh që qeveria i nxjerr për të bërë foto propagande. Për fat të keq çdo ditë e më shumë keqqeverisja dhe tallja me show po merr jetë njerëzish, po falimenton biznese dhe po shkakton trauma për qytetarët.”
Në fund të postimit të tij, Salianji nënvizoi se masat e ndërmarra nga qeveria për frenimin e koronavirusit funksionojnë vetëm për qytetarët e ndershëm.
“Sot kushdo e kupton që masat e qeverisë janë për të izoluar të varfërit, qytetarët që respektojnë ligjin , bizneset e ndershme, ndërkohë që kriminelët me armë lëvizin lirshëm dhe vrasin ditën për diell.”
Pasditen e kësaj të hëne dy persona, rreth të 60-ve u gjetën të pajetë në fshatin Lalm në Lezhë. Viktimat identifikohen si Preng Simoni dhe Kol Murrani, ky i fundit ishte rapsod i njohur i zonës.
Po ashtu, vëllezërit Viktor dhe Besmir Haxhia iu është bërë atentat pak më parë në Durrës. Automjeti më të cilin po udhetonin është qëlluar me breshëri në pjesën e përparme dhe të pasme të tij duke i lënë ata të vdekur në vend.
