Sot shënohen 21 vjet nga eksodi i shqiptarëve të Kosovës. Presidenti Hashim Thaçi shprehet se i kujton me pikëllim të thellë të gjithë viktimat e luftës në Kosovë.
Në një postim në “Facebook”, Thaçi shkruan se kriminelët serbë vijojnë të trajtohen si heronj në Serbi dhe se drejtësia ndërkombëtare po vazhdon të heshtë.
Ai nuk ka hezituar të falenderojë edhe të gjithë shqiptarët, të cilët hapën dyert shtëpive në ditët me të vështira për Kosovën.
“Mbi një milionë shqiptarë, 21 vjet më parë u dëbuan me forcë nga Kosova. Shteti i Serbisë në mënyrë mizore kreu mbi 400 masakra në Kosovë. Mbi 13 mijë civilë u vranë, nga të cilët rreth 1300 ishin fëmijë, si dhe mbi 20 mijë gra shqiptare u dhunuan. Sot kur shënojmë Ditën e Eksodit Shqiptar, i kujtojmë me pikëllim të thellë të gjitha viktimat e luftës në Kosovë. Kriminelët serbë, fatkeqësisht, vazhdojnë të jenë të lirë dhe të trajtohen si heronj në Serbi. Kurse, drejtësia ndërkombëtare po vazhdon të heshtë, duke i amnistuar këta kriminelë! Në Ditën e Eksodit Shqiptar, përderisa kujtojmë të kaluarën tonë të hidhur, kujtojmë edhe mikpritjen shqiptare kudo në rajon, në Shqipëri, në Maqedoni, në Mal të Zi, për të cilën do u jemi përjetësisht mirënjohës. Faleminderit që na i hapët zemrat dhe dyert e shtëpive tuaja në ditët më të vështira për popullin tonë!”
