Kryeministri Edi Rama kritikoi mënyrën se si prokuroria ka paraqitur incizime të bisedave të saj dhe pretendimet e paraqitura për arrest.
Në një deklaratë të gjatë, Rama tha se nuk ka prova bindëse që justifikojnë kërkesën për arrest dhe theksoi se paraqitja e një incizimi të një bisede telefonike të një të pandehure me një bashkëbiseduese është e tmerrshme dhe nuk mund të përdoret si provë pa ballafaqim apo verifikim.
Ai shtoi se prokurorët përdorën këtë incizim si rrethanë rënduese për të kërkuar arrestimin e Ballukut, e cila është prind e vetme e një vajze minorene, dhe e konsideroi këtë një veprim të nxituar dhe emocional, që nuk ka precedent.
Rama:
“Kur s’ka prova bindëse, shkruhet gjatë se flet prokurori. Kur ka prova bindëse, shkuhet shkurt se flasin provat.”
Por më e dhimbshme, sipas meje, është paraqitja e një incizimi të një bisede të një të pandehure me një bashkëbiseduese. Ku e pandehura na qenka kërcënuar. Nuk përmendet asgjëkundi në atë bisedë Belinda.
Unë nuk e kam dëgjuar, as nuk kam ndërmend ta dëgjoj. I kam tmerr këto forma.
Që e paska shtyrë prokurorin të marrë gjithë atë të përpjetë dhe të vijë të kërkojë nga parlamenti arrestimin e një deputete që është prind i vetëm i një vajze minorene.
Nuk po marr për bazë faktin që këtë kërcënim prokurori e kishte edhe para se ta pezullonte ministren, por e nxori vetëm kur ra masa e pezullimit, duke e përdorur si rrethanë rënduese për të kërkuar me çdo kusht arrestin.
Me një turravrap që ngjan me një reagim emocional. Ndaj rrëzimit të masës pezullimit nga masa kushtetuese.
Unë nuk po them fare as që një thënie e të pandehurit nuk ka vlerën e dëshmisë. Thëniet e tij merren me rezervë, pasi nuk konsiderohen si provë.
E zënë se e pandehura i thotë: “Belinda Balluku më ka lidhur pas karriges, më ka vënë në fyt një thikë, me pika gjaku të tharë, dhe më ka thënë: do të vras, po nuk the kështu apo ashtu.”
Unë po e marr që prokurorët kanë sjellë këtë. A mund të më tregoni si mund të vihet në Kuvend me një muhabet të tillë telefoni, pa bërë asnjë ballafaqim, asnjë verifikim, ku, kur ndodhi kjo gjë më parë?
Sado në mënyrë të tmerrshme të përshkruhet një bisedë telefonike mes dy grash, apo burrash, si u merka pas hekurave kaq kollaj një njeri, se folën dy veta në telefon?
