Kartmonedhat e reja do të jenë në treg nga data 30 qershor. Për të folur për impaktin në ekonomi të kartmonedhave të reja, në “E-Zone”, në “Vizion Plus” ishte i ftuar eksperti i ekonomisë, Mateo Spaho.
Ai tha se prerja 10.000 lekëshe i duhej ekonomisë shqiptare, pavarësisht risqeve, përfshirë këtu edhe transaksionet e dyshimta.
“Sa më e madhe të jetë prerja e monedhës, aq më shumë rriten rreziqet. Por fakti që ka disa risqe, nuk mund t’ia mohojmë ekonomisë këto instrumente pagese, të domosdoshëm. Një nga shqetësimet e pranishme nga ata që kanë diskutuar këtë prerje të re, ka qenë transporti i parasë në mënyrë të jashtëligjshme apo rreziqet që ekzistojnë në këtë sens. Unë besoj se nuk është faji i parasë, por i institucioneve që duhet të jenë sa më vigjilente. Kurse përsa u përket blerjeve të përditshme, janë supermarketet e mëdha që përfitojnë nga kjo kartmonedhë. Nuk është çështja që ta përdorin të gjithë.”
Kartmonedha 10.000 lekëshe sipas tij, do të ndihmonë në lehtësimin e pagesave. Ai shtoi se kjo që po ndodh në ekonominë shqiptare, nuk është ndonjë çudi e madhe, veçse një përafrim me vendet evropiane.
