Numri i të vdekurve nga lufta njëmujore midis Izraelit dhe Hamasit ka tejkaluar 11,000, me ushtrinë izraelite që hyri në Rripin e rrethuar të Gazës me sulme brutale nga qielli nga deti dhe nga toka, me një krizë të rëndë humanitare për palestinezët dhe pa një fund të qartë në horizont.
Një muaj më parë, Izraeli u zgjua nga tragjedia më vdekjeprurëse në historinë 75-vjeçare, kur militantët e Hamasit hynë në territorin izraelit, duke vrarë më shumë se 1400 dhe plagosur 5000 të tjerë, pjesa më e madhe e të cilëve civilë.
Në 7 tetor, militantët e Hamasit morën edhe rreth 240 persona të cilët vazhdojnë ti mbajnë peng edhe sot, prej tyre civilë dhe ushtarakë, shtetas izraelitë, por edhe të huaj.
Çfarë pasoi u bë muaji më i përgjakshëm për rreth 2.3 milionë palestinezët në Gaza. Ushtria izraelite, e kapur në befasi nga militantët islamikë, izoloi nga tre anë të kufirit dhe nisi një fushatë të përditshme sulmesh e bombardimesh.
Hakmarrja kolektive e Izraelit ka lënë të vrarë rreth 10 mijë palestinezë, pjesa më e madhe e të cilëve gra dhe fëmijë. 25 mijë të tjerë kanë mbetur të plagosur, ndërsa numërohen rreth 1.5milionë banorë të zhvendosur. Konflikti detyroi gjithashtu 200,000 izraelitë të zhvendoseshin brenda vendit.
Varrezat masive të mbushura me kufoma, numri i lartë i personave të plagosur, spitale e qendra strehimore të shkatërruara shfaqin një nga skenat më të tmerrshme në historinë e konflikteve në Lindjen e Mesme.
Mungesa e nevojave bazike si uji i pijshëm, ushqimet, medikamentet dhe karburanti e përkeqësojnë edhe më shumë situatën.
Shumë organizata humanitare botërore kanë ngritur alarmin dhe kanë akuzuar Izraelin për shkelje të rënda të të drejtave të njeriut, për shkak të goditjeve në infrastrukturën civile përfshirë shkolla dhe spitale. Konflikti ka çuar edhe në përplasje të forta mes Tel Avivit dhe Kombeve të Bashkuara.
Një muaj konflikt mes Izraelit dhe Hamasit kanë vënë në lëvizje diplomacinë botërore, përfshirë SHBA si aleati historik i shtetit hebre dhe kundërshtarin e saj më të madh Iranin. Dhjetëra krerë shtetesh kanë vizituar rajonin në muajin e fundit për të ndaluar përhapjen e konfliktit në të gjithë Lindjen e Mesme.
Shtetet perëndimore kërkojnë ndërprerje të luftimeve për arsye humanitare dhe lirimin e pengjeve, ndërsa shtetet arabe kërkojnë armëpushim të menjëhershëm. Por megjithë akuzat e forta, Izraeli ka vazhduar pa ndalur sulmet. Vazhdimësia e konfliktit mbetet e paqartë, ndërkohë që Izraeli kërkon shfarosjen e Hamasit.
