Ndonëse jemi në muajin e katërt e pandemisë, akoma ka 6.600 punonjës, të cilët i përkasin biznesit të madh, dhe që nuk kanë marrë akoma pagën e luftës.
Zëvendësministrja e Financave, Vasilika Vjero deklaroi për emisionin “E-Zonë” të gazetares Rajmonda Lajthia se pavarësisht thirrjeve të vazhdueshme të qeverisë, 1.200 biznese të mëdha nuk aplikuan për punonjësit e tyre.
Ajo shtoi se paga prej 40 mijë lekësh do të kalohet për ta brenda qershorit.
“Deri në këto momente janë rreth 41 mijë biznese që kanë aplikuar dhe kanë marrë këtë ndihmë financiare. Janë rreth 167 mijë të punësuar apo rreth 6.6 miliardë lekë që është disbursuar. Ajo që vumë re është që kishte biznese që edhe pse ju takonte kjo ndihmë financiare, nuk aplikonin dhe numri i tyre është 1.200. Numri i individëve që e përfitojnë, që janë të punësuar, është 6.600. Do të trajtohen financiarisht brenda këtij muaji.”
Sipas Vjeros, deri tani janë 400 kompani të mëdha që kanë përfituar nga garancia e parë sovrane.
“Deri në këtë moment, janë më shumë se 400 miratime, kompani që kanë përfituar nga garancia e parë sovrane në masën 5.6 miliardë lekë. Punonjës që kanë përfituar pagën janë rreth 44 mijë punonjës. Është vendosur për një shtyrje të afateve sepse një pjesë e shumës që ishte në dispoziion nuk është ezauruar nga të gjithsa bankat. Nuk është një proces që ka dështuar, thjesht kemi shtyrë afatin për të përdorur këtë shumë, që nëse nuk përdoret, do të rishpërndahet. Ndërsa nga garancia e dytë sovrane deri tani janë 3 kompani që e kanë përfituar këtë garanci. Është një kredi që në masë 60% do të mbulohet nga qeveria shqiptare dhe pjesa tjetër nga kompanitë. Do të jetë me fokus tek investimet dhe tek blerja e lëndës së parë për biznesin.”
E pyetur për një ndarje në mbështetje të bizneseve të vogla dhe atyre të mëdha, zëvendësministrja e Financave tha se po punohet për hartimin e një strategjie pesëvjeçare të të ardhurave, ku përfshihet edhe një rishikim i politikave fiskale.
