Kryetari i Lëvizjes Vetëvendosje, Albin Kurti dhe kreu i LDK, Isa Mustafa arritën marrëveshjen për qeverinë e re në Kosovë. Pas disa muajsh tentativa, Kurti dhe Mustafa gjetën gjuhën e përbashkët. Lajmin e bënë të ditur vetë krerët e partive këtë të diel në një konferencë për shtyp. Kurti e quajti një proces të vështirë nënshkrimin e koalicionit qeverisës.

 

“U dakordësuam për të zgjedhur qeverinë e re. Ne e kemi nënshkruar marrëveshjen dhe jemi marrë vesh për të gjitha. Kryetari Mustafa do mbajë mbledhje të Këshillit të Përgjithshëm. Unë si kryetar i Vetëvendosje mësova se po organizohet referendumi. Ishte një proces jo i lehtë.”

 

Kurti mori më 20 janar mandatin nga presidenti i Kosovës, Hashim Thaçi, ndërsa kërkoi që Kuvendi të mblidhet një ditë para skadimit të afatit kushtetues prej 15 ditësh për formimin e qeverisë. Për arritjen e marrëveshjes ndërhynë edhe ambasadorët e QUINT-it të cilët pak ditë më parë u takuan me Kurtin dhe Mustafën.

Leave a Reply

Your email address will not be published.