Qeveria e Zvicrës tradicionalisht neutrale do të rrisë shpenzimet ushtarake në vitet e ardhshme, edhe për shkak të luftës në Ukrainë.
Presidentja Viola Amherd tha se nga viti 2035, rreth 20 miliardë franga zvicerane (21 miliardë euro) fonde shtesë do të jenë në dispozicion në krahasim me planin që ekzistonte para luftës në Ukrainë.
Zvicra ka ndarë 1.9 miliardë franga për mbrojtjen e saj në vitin 2023.
“Situata e sigurisë politike është padyshim e vështirë duke pasur parasysh paqëndrueshmërinë aktuale, me një luftë në kontinentin evropian, konfliktet e armatosura në Lindjen e Mesme dhe pika të tjera të ndezura në botë,” tha Amherd në një konferencë shtypi të mërkurën.
Amherd, e cila është gjithashtu minister e Mbrojtjes, tha se aktualisht ka shumë kriza që po ndodhin dhe se plani pjesërisht merr parasysh mësimet nga lufta në Ukrainë.
Për 30 vjet, ushtria e Zvicrës ishte dobësuar nga shkurtimet pas përfundimit të Luftës së Ftohtë. Shumat e kursyera u drejtuan në fusha të tjera të politikës qeveritare.
Qeveria tha se do të kërkonte 4.9 miliardë franga (rreth 5 miliardë euro) në kredi për të blerë pajisje të reja ushtarake, duke përfshirë raketa të drejtuara dhe radarë të lëvizshëm për forcën tokësore, si dhe për të përmirësuar sistemet e komunikimit.
Zvicra gjithashtu do të ndërtojë një qendër të re të dhënash për ushtrinë dhe do të përmirësojë disa baza./vizionplus.tv
