Këto janë pamjet e para të tragetit “Euroferry Olympia” që u përfshi nga flakët rreth orës 4 të mëngjesit të kësaj të premteje, në afërsi të ishullit të Korfuzit, në detin Jon.
Në mjetin lundrues me flamur italian gjendeshin 239 pasagjerë dhe 51 anëtarë të ekuipazhit, me shtetësi greke dhe italiane. Ata janë evakuuar thuajse plotësisht dhe janë dërguar në portin e Korfuzit. Pasagjerët treguan momentet e tmerrit.
“Kam frikë për shokun tim, e kërkoj kudo, nuk e gjej. Ai e kishte vënë makinën e tij përballë times në momentin kur u nisëm. Kishim biseduar, me profesion ishte shofer dhe më kishte thënë se do të flinte në makinë. Nuk e di se çfarë mund të ketë ndodhur, shpresoj të gjendet dhe të mos ketë ndodhur asgjë më e keqe.”
“Momentet nuk përshkruhen dot me fjalë sepse në atë kohë të gjithë po kërkonim një mënyrë për të shpëtuar. Por falë Zotit gjithçka shkoi mirë.”
“Flakët filluan të dilnin nga garazhi. Ne u larguam me shpejtesi nga anija. Ishte atëherë kur dëgjuam shpërthime, me shume mundësi kanë qënë gomat e kamionit.”
Dy persona janë gjendur në garazh, aty ku mendohet se nisën flakët ndërsa janë ende në kërkim 11 persona. Sipas dëshmitarëve, mendohet se disa shoferë kamionësh frigoriferikë gjendeshin brenda mjeteve të tyre.
Sipas raporteve të deritanishme, nuk janë deklaruar viktima apo të lënduar.
Ministri i mbrojtjes Niko Peleshi bëri të ditur se fillimisht zjarri ka rënë jashtë ujërave tona territoriale, e më pas operacioni vijoi vetëm 5 milje larg Porto Palermos. Në operacionin e drejtuar nga pala greke janë angazhuar edhe anijet e Forcës sonë Detare, Butrinti dhe ajo patrulluese R-117.
Trageti po lundronte nga Igumenica, porti më i madh në Greqinë perëndimore, dhe ishte nisur për në portin italian të Brindisit, rreth nëntë orë larg. Ai është pjesë e flotës së grupit “Grimaldi Lines” dhe ka një kapacitet deri në 560 pasagjerë.
