Një zjarr i përmasave të mëdha ka përfshirë një sipërfaqe të konsiderueshme në zonën e Ksamilit pasditen e kësaj të enjte, duke shkaktuar panik mes banorëve dhe pushuesve që ndodhen aty për pushime.
Flakët, të favorizuara nga temperaturat e larta dhe era, janë përhapur me shpejtësi dhe aktualisht po i afrohen zonave të banuara.
Situata paraqitet problematike jo vetëm për banorët, por edhe për numrin e lartë të turistëve që ndodhen në Ksamil, një prej destinacioneve më të frekuentuara bregdetare gjatë muajve të verës.
Deri tani nuk raportohet për të lënduar, por autoritetet iu bëjnë thirrje banorëve që të jenë të kujdesshëm. Në vendngjarje ndodhen forca të shumta zjarrfikëse , duke u përpjekur të izolojnë flakët por për shkak të terrenit të vështirë, situata vijon të mbetet e ndërlikuar.
Hetimet pritet të nisin menjëherë pas vënies nën kontroll të situatës, ndërsa nuk dihen ende shkaqet e zjarrit.
Autoritetet u bëjnë thirrje po ashtu qytetarëve dhe turistëve të shmangin lëvizjet drejt zonave të prekura nga zjarri dhe të ndjekin udhëzimet e emergjencës për të garantuar sigurinë e tyre.
Kjo është vatra e dytë pas zjarrit në Qafë Gjashtë në afërsi të Lëkurësit, që ka rënë ditën e sotme.
