Delvina vijon të jetë edhe këtë të shtunë nën pushtetin e flakëve.
Zjarret që përfshinë disa fshatra mbeten ende aktive. Vatra kryesore ndodhet në kodrën përballë fshatit Palavli si dhe në Kopaçëz, ku flakët janë përhapur edhe në malin Borsh.
Për efekt sigurie rreth 2.000 banorë nga gjashtë fshatrat e prekur janë evakuuar, për të shmangur rrezikun ndaj jetës dhe pronës. Banorët shprehen se një situatë e tillë ishte e pazakontë.
Tre persona kanë pësuar djegie si pasojë e përhapjes së flakëve, ndërsa autoritetet lokale dhe strukturat e emergjencës janë në terren për të vlerësuar situatën dhe për të mbajtur nën kontroll vatrat aktive të zjarrit.
Paralelisht po punohet nga ana e Gjirokastrës mbi fshatin Fushë- Bardhë për të shmangur mbërritjen e flakëve edhe nga qyteti.
Sipas të dhënave të deritanishme janë djegur 11 banesa, si dhe kisha e fshatit Senicë. Dëmet materiale përfshijnë gjithashtu sipërfaqe të konsiderueshme toke bujqësore, pemtari, ullishte dhe blegtori.
Sipas ministrisë së Mbrojtjes, operacioni ka vijuar me të gjitha strukturat, të ndihmuar nga 60 efektivë dhe 4 automjete zjarrfikëse të FA-së dhe gjithashtu janë asistuar nga helikopterë.
Gjatë operacionit pati djegie Shefi i Komisariatit Delvinë, Agim Troci, si dhe 5 persona patën probleme nga asfiksia./vizionplus.tv
