Një banesë është përfshirë nga flakët paraditen e sotme në fshatin Buçimas, Pogradec. Zjarri dyshohet se ka nisur nga një magazinë me dërrasa pranë banesës, si pasojë e një mase elektrike.
Ndërhyrja në kohë e zjarrfikësve ka bërë të mundur izolimin e vatrës, duke shmangur djegien e plotë të banesës. Falë reagimit të shpejtë, është shpëtuar gjithashtu edhe një banesë tjetër ngjitur me objektin e përfshirë nga flakët.
Në vendngjarje kanë mbërritur edhe forcat e policisë, së bashku me grupin e emergjencave, për të kryer vlerësimin e dëmeve dhe për të nisur sa më shpejt procesin e rikonstruksionit.
Në banesë jetojnë katër gra, nëna dhe tre vajzat e saj, dy prej të cilave kanë probleme të rënda të shëndetit mendor. Fatmirësisht, të gjitha kanë arritur të dalin nga banesa pa lëndime, ndërsa familja ndodhet në kushte të vështira ekonomike.
Nga ana e Bashkisë Pogradec është bërë e ditur se procedurat e dëmshpërblimit do të përshpejtohen, me qëllim që familjes t’i ofrohet ndihmë sa më shpejt.
