Shqipëria hapi sot katër kapituj të tjerë të negociatave për anëtarësim në Bashkimin Evropian.
Në Bruksel u mbajt Konferenca e 6-të ndërqeveritare me Unionin evropian për Grupkapitullin IV: “Agjenda e Gjelbër dhe Ndërlidhja e Qëndrueshme”, ku u hapën 4 kapituj të tjerë: Politika e transportit, Energjia, Rrjetet trans-evropiane, Mjedisi si dhe ndryshimet klimatike.
Takimi u bashkëdrejtua nga Marie Bjerre, ministrja për Çështjet Evropiane e Danimarkës, vend që mban aktualisht presidencën e BE-së, dhe kryeministri Edi Rama i cili udhëtoi drejt Brukselit një ditë më parë.
Në një konferencë të përbashkët për shtyp, me kryeministrin Edi Rama dhe Komisioneren Evropiane për Zgjerim, Marta Kos, ministrja daneze Marie Bjerre tha se në këtë kohë, kur Rusia vijon agresionin ndaj Ukrainës, zgjerimi është bërë një nevojë që duhet për një BE më të fortë.
Ministrja deklaroi se Shqipëria ka ende shumë punë për të bërë, por ka treguar se qëllimi i saj është i qartë; anëtarësim në Bashkimin Evropian brenda kësaj dekade.
Ministrja Bjerre: Zgjerimi është bërë një nevojë që na duhet për një BE më të fortë dhe më të sigurt. Zgjerimi është një përparësi kyçe për presidencën daneze. Ky është një hap domethënës për Shqipërinë dhe BE-në, sepse shënon grupkapitullin e 6-të që çelet brenda një viti. Ka mbetur vetëm një për t’u hapur. Konferenca e sotme dëshmoi se zgjerimi po ecën përpara. Shqipëria ka bërë përpjekje të forta gjatë viteve, me luftën kundër korrupsionit dhe reformën në drejtësi. Shqipëria ka treguar se e sheh të ardhem e saj në Evropë. Nuk jemi ende në linjën e finishit, ka ende shumë punë, por drejtimi është i qartë. Danimarka do të bëjë maksimumin për ta çuar përpara zgjerimin. Është thelbësore që vendet të vijojnë të realizojnë reforma dhe të përmbushin kriteret. Shqipëri ju po bëni pikërisht këtë. Vazhdoni me punën e mirë./vizionplus.tv
