Sllovenët u janë drejtuar kutive të votimit në zgjedhjet presidenciale, me presidentin në detyrë Borut Pahor që kërkon mandatin e dytë pesëvjeçar të tij, përballë 8 kandidatëve të tjerë.
Nëse asnjë kandidat nuk do të fitojë më shumë se 50 për qind të votave, në raundin e parë, dy kandidatët që renditen të parët do të kalojnë në një raund të dytë, më 12 nëntor.
Edhe pse roli është kryesisht ceremonial, presidenti udhëheq ushtrinë dhe emëron zyrtarët më të lartë të vendit, përfshirë guvernatorin e bankës qendrore. Pjesa më e madhe e të zgjedhurve të tij, sidoqoftë, duhet të konfirmohen nga parlamenti.
