Pak orë para mbajtjes së votimit në Akademinë e Shkencave, Kryeministri Edi Rama ka mbajtur një qëndrim të ashpër publik, duke kërkuar reformimin e këtij institucioni.
Nëpërmjet një postimi në rrjetin social Facebook, kreu i qeverisë i ka bërë thirrje drejtuesve të këtij institucioni që ndërmarrin një reformë të thellë, në të kundërt shteti nuk do të japë asnjë “qindarkë për vijimin e punës së saj”:
Nëse nuk reformohet Akademia e Shkencave nuk do marrë më asnjë qindarkë nga buxheti e do të duhet të dorëzojë godinën! Prandaj #StopFarsës
Ky reagim vjen pasi Akademiku Artan Fuga me një letër publike drejtuar kryeministrit, denoncoi zgjedhjet si një farsë, pasi mbahen pa një garë të hapur të prezantimit të platformave për reformimin e institucionit dhe ku drejtuesit aktualë që garojnë për drejtimin e akademisë nuk kane bërë asnjë bilanc të punës së tyre.
Edhe në njoftimin publik të Akademisë thuhet rendi i ditës, ku përfshihen votimet, por nuk bëhen të ditura për opinionin emrat që garojnë për këtë post.
Mesohet se në garë për kreun e Akademisë së Shkencave është nënkryetari aktual Gudar Beqiri, ndërsa për postin e nënkryetarit eshte kryetari aktual Muzafer Korkuti.
Sikurse parashikohet në nenin 11 të ligjit, “Kryetari i Akademisë përzgjidhet drejtpërdrejt me votim të fshehtë nga Asambleja, nga radhët e anëtarëve të rregullt ose të përhershëm. Kryetar zgjidhet kandidati, i cili merr më shumë se gjysmën e votave të të gjithë anëtarëve të Asamblesë. Kryetari i zgjedhur nga Asambleja emërohet nga Presidenti i Republikës. Kohëzgjatja e mandatit të Kryetarit dhe të Zëvendëskryetarit është 4 vjet, ndërsa e Sekretarit Shkencor dhe e drejtuesve të seksioneve është 5 vjet”.
Për zgjedhjen e kryetarit te drejten e votes e kane 33 Akademikë, nga te cilet vetem 21 jane te pranishem. Nëntë Akademikë të tjerë e kanë sjellë votën e tyre me postë.
