Kryetari i Partisë Republikane, Fatmir Mediu u shpreh gjatë takimit me strukturat e kësaj partie në Laprak se në 25 prill do të ndahet e mira nga e keqja.
Sipas tij, kjo datë, do ta ribashkojë Shqipërinë me pjesën e përparuar europiane.
“Unë kam bindjen që me reforma të thella, me një qeverisje të drejtë, që buron nga vota e shqiptarëve, qeveris me shqiptarët, për interesin e shqiptarëve, padyshim brenda 4 vjeçarit të parë, do ta bëjmë Shqipërinë vend anëtar të Bashkimit Europian, falë reformave që kanë në radhë të parë interesin kombëtar si prioritet, interesin e Shqipërisë, luftën kundër krimit të organizuar. Kush mohon, nuk ndërton, dhe Edi Rama këtë bëri, vetëm mohoi.”
Mediu hodhi akuza edhe ndaj kryeministrit Edi Rama, për të cilin tha se shkatërroi konceptin e shtetit.
“Ai nuk pyet as për Partinë Socialiste, as për qeveri, as për Parlament, as për gjyqësor.”
Duke theksuar nevojën e bashkimit të së djathtës, Mediu vlerësoi rolin dhe historinë e kësaj force.
“Historia e ka vendosur të djathtën në anën e duhur, atje ku ka qenë interesi ynë kombëtar, dhe këtu duhet që Partia Demokratike, Partia Republikane dhe gjithë e djathta, t`i thërrasë kujtesës së vet historike. Historia e së djathtës ka filluar që në kohën e komunizmit, me të gjithë ata që u persekutuan nga sistemi komunist, me të gjithë ata që u shpronësuan nga sistemi komunist, me të gjithë ata që besuan në Zot në kohën e sistemit komunist, ata njerëz që me besimin në Zot, dinin të ndërtonin shpresë dhe besim tek njerëzit, u sakrifikuan me qindra klerikë.”
Po ashtu, kreu i PR-së shprehur kënaqësinë e angazhimit të të rinjve.
