Kryeministri Edi Rama ka komentuar nga Forumi Strategjik i Bledit në Slloveni, arsyet e fitores së thellë të Partisë Socialiste në zgjedhjet parlamentare të 11 majit, ku PS siguroi 83 mandate, kundrejt 50 mandateve të Partisë Demokratike.
Sipas Ramës, rezultati i lartë elektoral lidhet ngushtë me mesazhet dhe zotimet e Bashkimit Evropian për anëtarësimin e Shqipërisë brenda kësaj dekade.
“Nuk besoj se ka ndonjë vend tjetër në Europë ku mund të zhvillosh një fushatë zgjedhore pikërisht mbi premisën e BE-së. Arsyeja pse fituam kaq thellë këtë herë ishte shumë e lidhur me zotimin e BE-së dhe me thirrjen që të gjithë të mblidheshin rreth flamurit, për ta sjellë atë në BE,” tha Rama.
Kryeministri shtoi se gjatë forumit, një përfaqësues nga Sllovenia i kishte thënë:
“Po ecni shumë mirë drejt BE-së, por kini kujdes çfarë dëshironi, sepse ne jemi tashmë në BE dhe nuk po ecim aq mirë përbrenda saj.”
Në përgjigje, Rama theksoi se Sllovenia është në një pozitë të privilegjuar, duke pasur një listë përfitimesh që Shqipëria ende i dëshiron.
/vizionplus.tv
