Zëdhënësi i Presidencës, Tedi Blushi reagoi pas votimit në Parlament të ndryshimeve në Kodin Zgjedhor. Nëpërmjet një postimi në “Facebook”, Blushi përdori një gjuhë të ashpër kundër mazhorancës. Ata që bashkuan votat me PS, ai i quajti të blerë.
“Zero surprizë nga Kuvendi i Turpit dhe Kokoshkave, që ulin kokën dhe ngrenë dorën. Ka vetëm një fajtor dhe ky është Mister 1 Prilli ose Profeti i Kokoshkave. Të tjerët janë bashkëpunëtorët e tij të rëndomtë, të blerë, të kapur, të shantazhuar e të nënshtruar. Nesër publikojmë emrat e të gjithë atyre që ngritën dorën për izolimin e Shqipërisë deri në 25 Prill.”
Tedi Blushi paralajmëroi se presidenti Ilir Meta do t’i përgjigjet shumë shpejt këtij, provokuimi të poshtër, siç e quan ai. Sipas tij, ndryshimi nis pas 25 prillit.
“Presidenti është i qartë për shpartallimin e plotë të këtij komploti të mirëorganizuar prej 20 vitesh kundër popullit dhe kombit tonë, për defaktorizimin e shqiptarëve si një popull dhe komb europian. Tre milionë shqiptarë do të dinë si t’i përgjigjen këtij provokimi të poshtër, në mënyrë të bashkuar, europiane dhe Shqiptare. Askujt të mos i vijë keq për popullin shqiptar. Nuk jemi bërë për mëshirën e askujt. Do t’i dalim zot vetë vendit tonë dhe do tregojmë se e meritojmë Demokracinë dhe Lirinë. Nga 25 Prilli fillon një EPOKË E RE në Shqipëri. Ajo e sundimit të popullit përmes referendumeve. Vetëm kjo do garantojë sundimin e ligjit dhe fundin e kësaj oligarkie antishqiptare. Numërimi mbrapsht sapo filloi. JETËN E JAPIM, POR DEMOKRACINË DHE LIRINË KURRË MË!”
Sulmet e kryeministrit Edi Rama ndaj presidentit Ilir Meta këtë të hënë nuk ishin të pakta. Ai e akuzoi kreun e shtetit se po lidhet me krimin para zgjedhjeve.
