Parlamenti vendos sot nëse do të çojë apo jo në Gjykatën Kushtetueses mandatin e deputetes socialiste Olta Xhaçka.
Para se deputetët të vendosin më votë për të dytën herë për fatin e mandatit të saj, ish-ministrja e Jashtme Olta Xhaçka sqaroi se asnjëherë nuk ka përfituar fonde apo pasuri publike, as ajo dhe as familjarët e saj.
“Unë dhe familja ime nuk kemi përfituar asnjë qindarkë nga fondet publike! Zero! Asnjë centimetër katror truall shtetëror! Zero! Asnjë lehtësi procedurale te ndryshme nga të tërë të tjerët. Zero!”, tha Xhaçka.
Xhaçka ka theksuar se e vetmja gjë që bashkëshorti i saj ka përfituar është e drejta e përdorimit të plazhit.
“Dhe e dini çfarë është përfitimi nga statusi i investitorit strategjik te asistuar (i cili nuk është e njëjta gjë me statusin e shumëpërfolur te investitorit strategjik), pra përfitimi që sidoqoftë në çdo rast, ligjërisht, nuk i atribuohet fare drejtpërdrejtë bashkëshortit tim për një investim në hoteleri që kurrë mos u bëftë pas gjithë kësaj balte të pamerituar që solli në jetën tonë, por kompanisë, e cila në një të ardhme do të menaxhojë aktivitetin? Vetëm e drejta për t’u trajtuar me prioritet për lidhjen e njërës nga 1500 kontratat e përvitshme të qirasë për sipërfaqen e plazhit përpara hotelit! Pra të nxjerrë shezlonet në plazh”, tha Xhaçka.
Xhaçka ka sjellë në vëmendje se çështja e saj është shqyrtuar njëherë nga Gjykata Kushtetuese, por sqarimet e deputetes socialiste janë shoqëruar me debate nga deputetët demokratë.
“Sot Kuvendi s’ka çfarë voton fare për mua personalisht. Sepse çështjen time Gjykata Kushtetuese e ka pasur, i ka vajtur nga 1/5 e deputetëve këtu siç parashikon Kushtetuta, e ka shqyrtuar dhe me vendim e ka pushuar. Jo, sot këtu duhet të votohet për diçka krejt tjetër, që në fakt është shkalla e sovranitetit të parlamentit dhe liria e votës së çdo deputeti”, u shpreh Xhaçka.
Sipas opozitës, ish-ministrja e Jashtme ka shkelur Kushtetutën dhe mandati i saj duhet të shqyrtohet nga Gjykata Kushtetuese.
“Ditën që ky Parlament do grisë vendimin e Kushtetuese për ty, ky Parlament nuk është më i shqiptarëve por është Parlamenti i Artan Gaçit dhe Olsi Ramës”, tha Bardhi.
Në vitin 2022 dy grupimet e PD akuzuan ish-ministren Olta Xhaçka se ka shkelur Kushtetutën, pasi bashkëshorti i saj ka marrë statusin e investitorit strategjik dhe ka përfituar të drejtën për shfrytëzim të plazhin për 30 vite. Parlamenti asokohe e rrëzoi kërkesën dhe demokratët shkuan në Gjykatën Kushtetuese. Kushtetuesja vendosi që çështja e mandatit të një deputeti duhet të shqyrtohet vetëm nga kjo gjykatë, duke urdhëruar kuvendin të ridërgojë mocionin.
