Presidenti i Ukrainës, Volodymyr Zelensky, ka deklaruar se rreth 55 mijë ushtarë ukrainas kanë humbur jetën në fushën e betejës gjatë katër viteve të luftës me Rusinë. Shifra u bë publike gjatë një interviste për televizionin francez France 2, të mërkurën.
Zelensky theksoi gjithashtu se një numër i konsiderueshëm personash rezultojnë ende zyrtarisht të zhdukur. Si Kievi, ashtu edhe Moska, kanë publikuar herë pas here vlerësime për humbjet e palës kundërshtare, por kanë qenë të rezervuara në dhënien e detajeve për humbjet e tyre.
Ndërkohë, presidenti i Shteteve të Bashkuara, Donald Trump, po udhëheq përpjekjet diplomatike për t’i dhënë fund konfliktit, i cili nisi me agresionin rus ndaj Ukrainës më 22 shkurt 2022.
Të dërguarit specialë amerikanë, Steve Witkoff dhe Jared Kushner, dhëndri i Trumpit, zhvilluan për të dytën ditë radhazi bisedime me negociatorët rusë dhe ukrainas në Abu Dhabi, kryeqytetin e Emirateve të Bashkuara Arabe. Ky ishte takimi i dytë trepalësh i këtij lloji dhe, sipas Witkoff, diskutimet kanë qenë “të detajuara dhe produktive”, megjithëse mbetet ende shumë punë për t’u bërë.
Sipas burimeve diplomatike, çështja më e vështirë e negociatave mbetet territori, me Rusinë që kërkon nga Ukraina dorëzimin e pjesës së mbetur të rajonit lindor industrial të Donbasit.
Për herë të fundit, Zelensky kishte dhënë një përditësim mbi humbjet e ushtrisë ukrainase në dhjetor 2024, kur deklaroi se numri i të vrarëve ishte rreth 43 mijë.
/vizionplus.tv
