Autoritetet ukrainase kanë paralajmëruar për sulme të mëdha në lindje të vendit, ndërsa sipas tyre forcat ruse kanë filluar ofensivën në rajonin lindor të Donbasit.
Ministria britanike e Mbrojtjes njoftoi se forcat ruse bombarduan serish rajonet lindore. Ministria e brendshme në Kiev bëri të ditur se ushtria ruse po rigrupohet dhe po zhvendos pajisjet në rajonet e Donetsk dhe Luhansk.
Presidenti, Volodymyr Zelenskiy tha se vendi i tij është gati të kundërpërgjigjet dhe se ditët në vijim do të jenë vendimtare.
VOLODYMYR ZELENSKIY
PRESIDENT I UKRAINES
“Unë nuk pretendoj se jam një hero. Unë e dua familjen time. Dua të jetoj edhe shumë vite të tjera, por duke zgjedhur midis arratisjes dhe të qenit me njerëzit e mi, jam gati të jap jetën time për vendin tim.Trupat ruse do të ndërmarrin operacione edhe më të mëdha në Ukrainën lindore, por forcat tona do të jenë gati dhe do të kundërpërgjigjen. Ditët në vazhdim do të jenë po aq vendimtare sa çdo ditë tjetër në luftën gjashtëjavëshe.”
Ndërkohë përpjekjet e ndërkombëtarëve për të gjetur një zgjidhje diplomatike po vijojnë. Kancelari austriak Karl Nehammer do të udhëtojë në Moskë ku do të takohet me presidentin rus, Vladimir Putin. Kjo është vizita e parë në Rusi nga një udhëheqës evropian që kur Putin filloi sulmet në Ukrainë në fund të muajit shkurt. Edhe ministrat e Jashtëm të Bashkimit Evropian, do të takohen për të diskutuar një raund tjetër sanksionesh kundër Rusisë.
