Kompania “Integrated Energy”, që ka fituar të drejtën e përpunimit të mbetjeve në Landifllin e Sharrës, që njihet si projekti i inceneratorit të Tiranës, i është përgjigjur disa prej akuzave të ngritura nga politika. Administratorja e kompanisë Ariola Kodra dha këtë përgjigje për moderatoren Rajmonda Lajthia në emisionin E-ZONE në Vizion Plus lidhur me pronarët e këtij koncesioni.
Rajmonda Lajthia: A janë Klodian Zoto dhe Mirel Mërtiri pronarët e këtij koncesioni?
Ariola Kodra: Ne jemi vënë shpesh në qendër të akuzave, mund t’ju them se këta zotërinj nuk janë pronarët e këtij projekti, sikundër flitet në media apo në akuzat politike.
Rajmonda Lajthia: Nëse nuk janë këta zotërinj, atëherë kush janë pronarët?
Ariola Kodra: Janë shoqëri të nderuara që operojnë sipas ligjeve dhe standardeve të kompanive evropiane.
Znj.Kodra ftoi të gjithë skeptikët e këtij projekti të shkojnë në Landfillin e Sharrës dhe të shohin ndryshimet që ka pasur kjo zonë si pasojë e punimeve që po kryen kompania koncesionare. Referuar të dhënave, inceneratori i Tiranës pritet të fillojë në janar të vitit 2021.
Administratorja e kompanisë hodhi poshtë edhe akuzat se kanë përfituar para nga buxheti i shtetit, duke sqaruar se kanë marrë vetëm tarifën prej 29 eurosh për përpunimin e mbetjeve.
