Një ditë pas ngjarjes së rëndë ku dy persona u vranë për shkak të kërkesës për një kafe, policia ka vënë në pranga 4 persona, të gjithë të akuzuar për moskallëzim krimi.
Në pranga u vunë Ergi Kadiu 25-vjeç, Erald Cani 21-vjeç si dhe dy vëllezërit Taulant dhe Emirjan Beqja 37 dhe 34-vjeç.
Lexo edhe :
Ndërkohë që në kërkim përveç autorit të vrasjes së Flori Paluçit, Daniel Pepa është shpallur edhe një 30-vjeçar me akuzat e armëmbajtjes pa leje, moskallëzim krimi si edhe përkrahje e autori të krimit.
Sipas policisë, 21-vjeçari Daniel Pepa ka hyrë në lokal dhe ka debatuar me kamarierin dhe me Flori Paluçin që shoqërohej nga disa të tjerë, ndër të cilët edhe Erald Cani i arrestuar për moskallëzim krimi.
Pepa debatoi pasi kërkoi kafe ndërsa kamarieri Alteo Pepa i tha se ekspresi ishte i fikur.
Pas konfliktit verbal, Daniel Pepa është larguar me automjet dhe më pas është kthyer bashkë me Ergi Kadiun dhe Aranit Kurtin.
Teksa ata kanë tentuar të hyjnë sërish në lokal, ka dalë Flori Paluçi dhe ka qëlluar me armë zjarri.
Në këtë moment, Daniel Pepa ka qëlluar me armë zjarri në drejtim të Paluçit duke e plagosur, ndërsa Aranit Kurti e ka qëlluar me grushte në fytyrë. Paluçi, sipas policisë, ka qëlluar ndaj të dyve. Nga plumbat mbetën të vrarë Aranit Kurti që u qëllua nga Paluçi, ndërsa ky i fundit u vra nga Daniel Pepa.
21-vjeçari Pepa i shpallur në kërkim akuzohet për vrasje me dashje dhe armëmbajtje pa leje. Ngjarja e rëndë ndodhi rreth orës dy të mëngjesi të së mërkurës në një lokal në afërsi të një pike karburanti në Manzë.
