Është zbardhur qëndrimi i pesë anëtarëve të opozitës në Këshillin e Mandateve dhe Imuniteteve, ku diskutohet kërkesa e SPAK për heqjen e imunitetit të Belinda Ballukut.
Pasi kanë dëgjuar parashtrimet nga Prokurorët e Posaçëm, të cilët janë shprehur se kanë fakte dhe prova të reja, ku Balluku ka intimiduar vartësit e saj për të ndryshuar dëshminë, deputetët e opozitës rekomandojnë që Kuvendi të votojë më 5 mars pro heqjes së imunitetit dhe t’i hap rrugë arrestimit të zv.kryeministres.
“Përfundimisht, 5 deputetët e Këshillit për Imunitetin,përfaqësues të opozitës, në mbështetje të neneve 73, 95, 103 të Kushtetutës, neneve 260, 288, 289 të Kodit të Procedurës Penale, si dhe neneve 13 dhe 118 të Rregullores së Kuvendit;
R E K O M A N D O J N Ë:
Deputetët në seancë plenare të Kuvendit të Republikës së Shqipërisë të votojnë pro, për miratimin e kërkesës nr. 43019Prot., datë 16.12.2025 të Prokurorisë së Posaçme Kundër Korrupsionit dhe Krimit të Organizuar, duke vendosur:“Dhënien e autorizimit nga Kuvendi i Republikës së Shqipërisë, për arrestimin/heqjen e lirisë nëpërmjet zëvendësimit të masës së sigurimit nga ajo e “Ndalimit të daljes jashtë shtetit” e parashikuar nga neni 233 i K.Pr.Penale dhe “Pezullimit të ushtrimit të një detyre a shërbimi publik”, e parashikuar nga neni 242 i K.Pr.Penale, në atë të arrest në burg/në shtëpi, për znj. Belinda BALLUKU”, e cila ushtron funksionet e deputetit, ministrit dhe zëvendëskryeministrit, në kuadër të procedimit penal nr. 136 të vitit 2025, ku ajo është marrë si e pandehur dhe person nën hetim, për shkak se dyshohet se ka kryer, në mënyrë të përsëritur, veprën penale: “Shkelja e barazisë së pjesëmarrësve në tendera apo ankande publike”, kryer në bashkëpunim, parashikuar nga nenet 258/2 e 25 të K.Penal.”
Nga ana tjetër, Partia Socialiste thotë se masat e marra deri tani nga prokuroria janë të mjaftueshme.
Manja: Masat e deritanishme nga prokuroria janë të mjaftueshme./vizionplus.tv
