Diskutimi për buxhetin e Ministrisë së Brendshme nisi me debate në komisionin e sigurisë. Deputeti i PD, Flamur Noka kërkoi sqarime nga ministri i brendshëm Xhafaj se përse policia e Elbasanit e fshehu ngjarjen, ku u arrestua biznesmeni Orest Sota dhe në makinë iu sekuestruan 863 mijë euro dhe dy patenta të Saimir Tahirit.
Flamur Noka: Kam disa pyetje. Pse nuk eshte Haki Çako ne prezantimin e buxhetit? Policia që ju drejtoni, a është policia që duam? Para disa ditësh u hoq një mini jaht pasi plasi skandali i Tahirit. I kujt ishte? A mund të na bëni një koment për fshehjen nga policia të skandalit të Elbasanit, ku u gjeten 863 mije euro dhe tre patenta? Ju do merrni patente skafi se qeveria e rilindjes e ka bere tradite?
Për këtë ministri i brendshëm Fatmir Xhafaj deklaroi se ka ngarkuar Shërbimin e Kontrollit të Brendshëm për të hetuar ngjarjen, ndërsa shtoi se gjithçka është e regjistruar dhe tashmë përgjegjësinë e ka prokuroria.
“Lidhur me ngjarjen e Elbasanit, policia e shtetit ka bërë detyrën konform ligjit. Lidhur me shqetësimin e politikës ka ngarkuar SHÇKB të hetojë për përgjegjësitë që kanë policët në këtë detyrë. Ajo që dua të bëj me dije është që gjithçka ka ndodhur është e regjistruar dhe i është paraqitur prokurorisë. Pak orë më vonë, çështja është filluar nga prokuroria dhe përgjegjëse është prokuroria. Ajo përcakton nëse ka shkelje nga policët në këtë ngjarje.”
Gjatë diskutimeve, ministri i brendshëm lajmëroi dhe për pajisje të reja sekrete, të cilat do të shërbejnë për operacionin Forca e Ligjit. Ai tha se nuk mund të bëhen publike në këtë moment por vijnë nga bashkëpunimi i Shqipërisë me SHBA e BE.
Xhafaj sqaroi se më 1 janar nis vetingu në polici, ndërsa shumë shpejt gjobat e policisë rrugore do të bëhen të gjitha online.
