Përfaqësuesi i Komitetit Ndërministror për Emergjencat Civile, për Qarkun Lezhë, Etjen Xhafaj ka bërë bilancin e gjendjes aktuale në këtë zonë pas tërmetit të 26 nëntorit.
Xhafaj tha se dhe këtë të martë ka vijuar shpërndarrja e pakove me ushqime dhe ndihma për 225 çadra.
Ai njoftoi më tej se po bëhet zëvendësimi çadrave verore me ato dimërore në mënyre që qytetarët të kenë kushte më të mira.
“Mirëmbrëma, sot në qarkun e Lezhës kemi vijuar me shpërndarjen e pakove me ushqime dhe ndihma për 225 çadra, të cilat janë të vendosur aktualisht në territor. Ndërkohë që flasim janë ende duke u zëvendësuar dhe vendosur çadrat e reja dimërore, duke zëvendësuar ato që ishin çadra verore, për të pasur mundësi që t’u mundësojmë edhe më shumë kushte qytetarëve. Në mbledhjen e Shtabit kemi diskutuar për vendimet e këshillave bashkiake, të cilat kanë kaluar në të trija bashkitë, pra, në Mirditë, Lezhë dhe në Kurbin, përsa i përket regjimit të qirave. Prandaj nga nesër dua t’i ftojmë të gjithë qytetarët, të paraqiten pranë sporteleve të bashkive për të tërhequr dhe plotësuar formularët, që të mund të tërheqin pagesat e qirave. Gjithashtu nga ora 11 e tutje, këtë shërbim do ta ofrojmë edhe pranë tre hoteleve në Shëngjin, ku janë të vendosur deri tani një numër i madh i të evakuarve brenda qarkut. Fokusi vazhdon të mbetet vlerësimi në terren dhe deri tani nga të gjithë grupet, të cilët janë aktivë në të gjithë qarkun, nga Mirdita, në Kurbin dhe në Lezhë janë bërë deri tani 2280 verifikime të objekteve dhe një numër i madh aktesh konstatimi. Në vijim do të kalojmë edhe vendimmarrjen për të filluar për të marrë hapat e parë në terren, për të filluar me shembjen e godinave dhe pastaj për të rifilluar me procesin e rindërtimit. Qendra Operacionale e Emergjencës Civile mbetet e hapur dhe e gatshme t’u shërbejë të gjithë qytetarëve. Do të vazhdojmë sërish nesër me shpërndarjen e çadrave dimërore dhe gjithashtu me përgjigjen për t’iu gjendur pranë të gjithë qytetarëve. Gjithashtu nga nesër do të ketë edhe grupe verifikimi, të cilët do të mbulojnë fshatra të ndryshëm dhe zonat rurale për të filluar dhe vlerësimin e dëmeve aty në banesa dhe në dëme materiale të tjera që mund të kenë pasur banorët. Faleminderit!”
