Një bisedë e regjistruar midis dy pilotëve të Boeing 787 të Air India që u rrëzua në Ahmedabad të Indisë muajin e kaluar tregon se ishte piloti më me përvojë, kapiteni, ai që ndërpreu karburantin në motorë, raportoi të mërkurën Wall Street Journal.
Më 12 qershor, 260 persona humbën jetën pasi avioni i Air India u rrëzua pak minuta pas ngritjes.
Sipas raportit paraprak, bashkëpiloti i avionit e pyeti kapitenin me përvojë pse i kishte kthyer çelësat që rregullonin fuqinë e të dy motorëve në pozicionin “ndërprerës”, disa sekonda pasi avioni u ngrit nga pista.
Bashkëpiloti ishte Clive Counder, 32 vjeç, me 3,403 orë përvojë fluturimi, ndërsa kapiteni ishte Sumit Sabawal, 56 vjeç, me 15,638 orë përvojë fluturimi.
A vuante nga depresioni?
Zbulimi i WSJ vjen vetëm 24 orë pasi raportet sugjeronin se Sabawal kishte vuajtur nga depresioni vitet e fundit.
Eksperti indian i sigurisë së aviacionit Mohani Ranganathan i tha Daily Telegraph se disa pilotë të tjerë të Air India kishin dëshmuar se kapiteni i fluturimit fatal kishte probleme psikologjike.
“Përgjatë 3-4 viteve të fundi tai kishte marrë pushime”, i tha ai gazetës britanike.
Raportet tregonin se piloti 56-vjeçar kishte marrë pushim me rekomandim nga mjeku pas vdekjes së nënës së tij, megjithëse duket se atij i ishte dhënë “drita jeshile” për t’u rikthyer në kabinën e pilotit.
Gjetja e parë
Sipas raportit paraprak të hetimit të aksidentit, të publikuar të shtunën, avioni i pasagjerëve po udhëtonte me 333 kilometra në orë dhe sapo ishte ngritur kur çelësat e dy motorëve u kthyen nga pozicioni “i ndezur” në pozicionin “i ndërprerë”.
Raporti nuk specifikoi se nga kush. Motorët humbën menjëherë të gjithë fuqinë.
Raporti paraprak nuk përcaktoi fajin për aksidentin, por vuri në dukje se njëri nga pilotët e pyeti tjetrin pse e kishte ndaluar furnizimin me karburant të motorëve, tjetri u përgjigj se jo.
Aeroplani humbi lartësinë dhe u përplas me ndërtesat brenda gjysmë minute. Në mbeturinat e mbetura pas rrëzimit, çelësat u gjetën të kthyer në pozicionin “në punë”. Të dhënat nga regjistruesi i të dhënave të fluturimit tregojnë se motorët u rindezën pak para rrëzimit, por ishte tepër vonë për ta parandaluar tragjedinë./vizionplus.tv
