Presidenti i Iranit: Marrëveshja e paqes me SHBA-në nuk është e pamundur!
Presidenti i Iranit, Masoud Pezeshkian, ka deklaruar se arritja e një marrëveshjeje paqeje me Shtetet e Bashkuara të Amerikës nuk është e pamundur, duke theksuar se Teherani është i hapur për zgjidhje diplomatike nëse respektohet e drejta ndërkombëtare.
Deklarata e tij erdhi gjatë një bisede telefonike me presidentin rus, Vladimir Putin, me të cilin diskutoi mbi situatën ushtarake dhe tensionet e vazhdueshme me SHBA-në dhe Izraelin.
Sipas agjencisë iraniane të lajmeve Fars, Pezeshkian nënvizoi se Irani kërkon një marrëveshje të balancuar, por pa cenuar sovranitetin dhe interesat e tij kombëtare.
“Irani është plotësisht i përgatitur të arrijë një marrëveshje të balancuar dhe të drejtë që garanton paqe dhe siguri të qëndrueshme në rajon. Vijat tona të kuqe janë interesat kombëtare dhe të drejtat e popullit iranian. Nëse Shtetet e Bashkuara i përmbahen kornizave ligjore ndërkombëtare, arritja e një marrëveshjeje nuk është e pamundur”, citohet të ketë thënë Pezeshkian.
Gjatë bisedës me udhëheqësin rus, presidenti iranian vuri theksin te rëndësia e bashkëpunimit mes vendeve të rajonit për të garantuar stabilitetin, duke kundërshtuar praninë e fuqive perëndimore në Lindjen e Mesme.
Ai deklaroi se Irani është i gatshëm të bashkëpunojë me fqinjët e tij për të arritur paqen pa praninë apo ndërhyrjen e vendeve jashtë rajonit.
Agjencia Fars raportoi gjithashtu se presidenti rus Vladimir Putin mbështeti qëndrimin e Teheranit, duke theksuar se Uashingtoni dhe Tel Avivi duhet të mbajnë përgjegjësi për veprimet e tyre ushtarake.
Sipas raportimeve, Putin nënvizoi nevojën që SHBA-ja dhe Izraeli të paguajnë dëmshpërblime lufte ndaj Iranit, si dhe t’i ofrojnë Teheranit garanci afatgjata sigurie për të parandaluar çdo përsëritje të mundshme të agresionit ushtarak në të ardhmen.
