Qytetarët me shtetësi serbe që jetojnë në Kosovë do të votojnë në komunat e Serbisë qëndrore, për zgjedhjet presidenciale dhe parlamentare që do të mbahen më 3 prill.

 

Vendimi u bë i ditur nga presidenti Alexandër Vuçiç, pas mbledhjes së Këshillit të Sigurisë Kombëtare dhe konsultimit me ambasadorët e vendeve të QUINT-it si dhe me përfaqësuesit politikë të serbëve të Kosovës.

 

Kreu i shtetit serb deklaroi se çmimi që vendosi Prishtina për hapjen e vendvotimeve në territorin e Kosovës ishte njohja e pavarësisë, por kjo do të refuzohet me çdo kusht.

 

ALEKSANDER VUCIC

PRESIDENT I SERBISE

 

“Kemi pranuar kompromise të panumërta që kanë insistuar vetëm për t’u mundësuar njerëzve që të dalin në votime për atë që ata dëshirojnë të votojnë, por ata kanë këmbëngulur dhe kanë kërkuar vetëm një gjë dhe kjo është që Serbia të pranojë pavarësinë e Kosovës. Serbia nuk ka mundur ta pranojë këtë dhe Serbia nuk do ta pranojë, pavarësisht çmimit”. Asnjë votë dhe pushteti i askujt nuk është aq i rëndësishëm sa shteti është i rëndësishëm për ne. Prandaj nuk u pajtuam me këtë.”

 

Më herët, Brukseli zyrtar nuk e ka mirëpritur vendimin e Kosovës, duke u shprehur se ka injoruar propozimin e Shteteve të Bashkuara, Britanisë së Madhe, Italisë, Gjermanisë dhe Francës.

 

PETER STANO

ZEDHENES PER POLITIKEN E JASHTME, BE

 

“Duke pranuar se Serbia ka qenë e hapur për gjetjen e zgjidhjes, ne shprehim keqardhje se konsensusi mes palëve në fund nuk u arrit pas vendimit të Kosovës për të refuzuar propozimin konstruktiv të Quint-it. Vendimi është në kundërshtim me përkushtimet e Kosovës për rrugëtim evropian dhe të ardhme demokratike dhe kundër parimeve të mbrojtjes së të drejtës demokratike të të gjithë qytetarëve, përfshirë edhe të atyre që i takojnë popullatës joshumicë.”

 

Zëdhënësi i Bashkimit Evropian për punët e jashtme, Piter Stano gjithashtu i ka bërë thirrje Kosovës dhe Serbisë që të përmbahen nga veprimet dhe retorika, e cila mund të rrisë tensionet mes tyre dhe të veprojnë me përgjegjësi, në kuadër të dialogut.

Leave a Reply

Your email address will not be published.