Ka qenë pikërisht ekspertiza paraprake e cila vendosi në lëvizje policinë e Tiranës ku hetimet morën një kthesë 180 gradë, nga ngjarje aksidentale në vrasje me dashje.
Dyshimet fillestare ishin përqendruar në një aksident të mundshëm, ku i moshuari pasi ishte dalë nga banesa kishte rrëshqitur duke përplasur kokën në gurë, e për pasojë ndërroi jetë në vend.
Lexo edhe :
Por mjekësia ligjore përcaktoi qartë se goditjet ishin shkaktuar nga sende të forta, çka për blutë ngre dyshime se 81-vjeçari mund të jetë goditur në kokë nga ndonjë person tjetër.
Një nga pistat e hetimit është ajo e ndonjë konflikti që i moshuari mund të ketë patur me banorë të zonës për punët e fshatit.
Megjithatë nuk përjashtohet mundësia që të jetë vrarë me qëllim për t’u vjedhur.
Burimet thonë se Metës nuk i është gjetur portofoli dhe disa sende të tjera që mbante me vete, por nga ana tjetër banesa brenda është gjetur e paprekur.
Grupi hetimor ka marrë në pyetje familjarët e viktimës të cilët kanë thënë se nuk janë në dijeni nëse i moshuari të ketë patur konflikte me njerëz të tjerë të zonës.
Sipas tyre në fshat shumica e banesave kanë lidhje farefisnore mes tyre.
Në pyetje gjithashtu janë marrë edhe banorët e tjerë por edhe dëshmia e tyre nuk i ka ndihmuar hetuesit./vizionplus.tv
