Një ngjarje e rëndë ndodhi mbrëmjen e djeshme në Shkodër, ku një 15-vjeçar vrau një bashkëmoshatarin e tij me thikë.
Në studion e “Vizionit të Pasdites”, të ftuarit analizuan ngjarjen dhe vunë në dukje se krimet mes të miturve kanë ardhur duke u rritur nga viti në vit.
“Ky është një zinxhir si fenomen. Është e pritshme që të kemi raste që nuk kanë munguar vit pas viti. Rinia e sotme po rritet në një mjedis shumë armiqësor me njëri-tjetrin. Edhe pranë linjes kombëtare të këshillimit të fëmijëve, në shumë telefonata vërejmë që ka një gjuhë urrejtjeje, që nuk është e përshtatshme për moshën e tyre. Kemi një mosrespektim nga ana e fëmijëve, adoleshentëve ndaj të rriturve, ndaj profesionistëve.
Fillon që nga bullizmi në shkollë, nga një ngacmim i vogël e deri në raste që shkojnë fatale. Ka shumë element që mund të ndikojnë. Mund të analizojmë familjen, komunitetin, shkollën. Mund të jetë varfëria në familje një element.
Kemi një numër të lartë nga viti në vit që i kategorizojmë si ofenduese, fyese, tallëse”, tha Klaudio Pulaha, punonjës social tek “Alo 116”.
Ndërkohë, psikologia Eksela Qirici tha se shoqëria është duke bërë diçka gabim në raport me mënyrën si po i rrit të rinjtë.
“Do doja ta shihja në këndvështrimin tjetër. Për aq kohë sa janë të mitur, duhet hedhur edhe dyshimi që ne sit ë rritur, ne si shoqëri po bëjmë diçka gabim në raport me mënyrën e edukimit. Në shumë nga veprat penale që bëhen nga të miturit, bashkëshoqërohen me një situatë që lidhen substancat narkotike. Për sa kohë ne si shoqëri u kemi shtuar të rinjve mundësinë që eksperimentojnë me substancat u kemi shtuar mundësinë që të përfshihen në krim.
Familja e sotme përbën më shumë mundësi që brenda psikologjisë së një të mituri të shtohen këto doza inati, urrejtjeje. Edhe sistemi arsimor i yni po krijon shumë vështirësi. Të gjitha këto krijojnë mundësinë që të miturit të bëhen të paedukatë, të mos respektojnë asnjë lloj norme”, tha ajo.
Nga ana tjetër, tha eksperti i kriminalistikës Artan Rexhepi se në shoqëri mbizotëron modeli i “të fortit”.
“Në shoqëri është modeli i të fortit. Edhe ne të rriturve na vënë në pozita pa shkak.është krijuar ideja e një shoqërie shumë offensive. Gjykoj që viktima që e ka marrë atë thikën, mund të jetë konfrontuar fizikisht më parë”, tha Rexhepi. /vizionplus.tv
