Ministria Për Evropën dhe Punët e Jashtmë e Shqipërisë reagoi në lidhje me ngjarjen e ndodhur në Korfuz ku humbi jetën një shtetas shqiptar.
Zëdhënësja e MEPJ Edlira Prendi, bëri me dije se Ambasada e Republikës së Shqipërisë në Athinë është njoftuar nga Drejtoria e Përgjithshme e Policisë së Atikës, mbi vrasjen e shtetasit shqiptar Petrit Zifle, i lindur më 03.07.1955 në Shqipëri, banues në qytetin e Beratit dhe së fundmi me banim në Sparteron Korfuz.
MEPJ shpreh keqardhjen për humbjen e jetës së shtetasit Petrit Zifle ndërsa përshëndeti kapjen e autorit nga policia greke.
Autoritetet shqiptare bëjnë thirrje për një hetim të plotë në funksion të zbardhjes tërësore të rrethanave të ngjarjes.
Referuar mediave greke për ngjarjen e ndodhur në 25 nentor dyshohet se Zifle ishte konfliktuar me fjalë një ditë para vrasjes në një lokal të fshatit me autorin për çështje të karakterit etnik.
Autor i ngjarjes rezultoi pikërisht 44-vjeçari nga Korfuzi, që rezulton anëtar i Agimit të Artë në Lefkimi, madje dhe përfaqësues i kësaj partie në zgjedhje, pas konfliktit në lokal, autori është larguar dhe e ka pritur shqiptarin në një rrugë duke I bërë pritë e duke e vrarë, shqiptarin nga Berati që punonte në Kofuz.